Naria saeo saito ngana langgai noumuru patampae nosanga i Timos,
ia nakadoa bo eo bongi ia nekakai nombaronde tinana " Mama....Mama ".
sabana nandasa mpuu nirasaina.
bara sakuya eo ia nakadoa, nabelomo duana.
nabelopa ia, ngana haitu nomore ri doyata.
da rasa mpomore sampesanika noliu binata nasoa, bo nompakaeka rara ngana haitu.
Nongaremo ngana haitu nekakai " Papa.."
nompeinta tesa i Timos haitu, kita mantanondoaka ri tempo kita riara nggasusa bara nadua,
i sema rapekakaita? merapi tulungi nte i sema?
Nadea tona tempo nasusa mpuu nirasaina, tempo nadua nantamo mpuu nirasaina
ira ledo nerapi tulungi nte Tupu Alatala,
naria muni sanu tona, nosambaya nerapi nte Tupu tapi rarana ledo mpuu-mpuu nomparasaya Tupu.
riara buku Matius 11 : 28 nalantomo niuliNa ivei
"Isema-sema nandasa bo nantamo kasusa nirasaina,
kakavamo nte Yaku! Yaku mompakangaa kasusa nirasaina"
berimba nte kita?
Tempo manggava kasusa bo kandasa domo raparasayata i Pue mompakangaa kandasa
bo kasusa anu nirasaita?
nibaca pangane tesa i Timos, ngana haitu nadua ia nekakai nte tinana,
ia domo nompakule mokuya-kuya aga tinana nipekakaina.
jadi pura-pura anu nirasaina haitu, kandasa, nadua, niparasayakana tinana,
domo nipangisanina bara masalisa, bara masae pade mabelo dako ri duana.
ngana haitu aga nekakai njuu nerapi.
dako ri tesa haitu i Timos batena nerapi tulungi njuu, ia nosabara sampe sakuya eo kasaena ia nadua.
pade ia nabelo dako ri duana.
ivesia muni tempo ia naeka, ia nekakai ka tuamana.
sabana niparasayana aga tuamana anu nombajagai ia dako ri binata nasoa.
ivesia muni nte kita, tempo kita nadua, tempo kita merapi tulungi, tempo nekakai
ledo muni kaliu-liu nidekei kabelo ka kita.
kita nipatuduki kana mosabara, nemo manjarumaka kuasa nu dunia.
nadea tona nanguli kuasa nu dunia tempo kita nekakai, tempo kita netalendu
eva aga sampida mata kaliu-liu nariamo anu niperapita.
Toramo... ledoria kuasa ntanina anu nompakangaa kasusa bo kandasa anu nirasaita
eva anu niuli ri buku Matius 11 : 28.
nadea tupu ri dunia hitu, tapi aga Tupu Alatala anu nombadekei katuvu masana sampe ri kasae-saena.
ane kita merapi bo manjarumaka kuasa-kuasa ntanina ri dunia,
kita nasimbayu aga masana ri dunia, ledo madota masana sampe ri kasae-saena.
kita aga manjarumaka kuasa ntanina ri dunia, nasimbayu kita ledo manjarumaka Alatala.
sabana Alatala nanguli aga Ia anu rasarumaka,
ledoria saitoa mamala manggeni kita masana sampe ri kasae-saena.
Tanondoakamo,
i sema rapekakaimiu? tempo komiu nasusa i sema rasarumakamiu?
ane komiu mosabara, batena merapi bo batena manjarumaka Tupu Alatala.
parasayamo Ia mompakangaa kasusa bo kandasamiu.
Perapimo nte Yaku ri tempo nggasusa,
Kukabasaka komiu, bo komiu mombatoiya Yaku
Mazmur 50 : 15 nibatuasi ri Basa Ledo
